Ṭamdila Tourism dept. hmunhma Kuminah ṭum hnih cheiṭhat a ni ; Cheiṭhatna atan cheng nuai 19.72 seng

Tourism department chuan kuminah Ṭamdila an department hmunhma chu ṭum hnih an cheiṭha tawh. Cheiṭhat hna thawktu tur tender hmanga zawng loin, department-in an thawk a, cheng nuai 19.72 an séng.

Vanglaini-in RTI Act hmanga a zawhna Tourism depart­­ment-in an chhan danin, Ṭamdila Tourism department hmun­hma chu a ṭum khatna atan Envi­ronment Forest & Climate Change (EFCC) aṭanga Upgra­dation of Tourist Facility at Ṭamdil Lake atana sum hmuh cheng nuai 19.38 hmanga cheiṭhat a ni a; February-March, 2022 chhung­in cheiṭhat hna thawh a ni.

Sum hman dan chu - camping ground infra­structure atan cheng nuai 12.71, cottage leh reception thawm ṭhatna atan nuai 5.57, contingency-ah Rs 91,000 leh labour cess-ah Rs 18,000 a ni. Contingency Rs 91,000 hmangin esti-mate-a awm lo, thawm ṭhat ngai site chu extra work angin thawh a ni.

Cheiṭhat ṭum hnihna chu August 2022 khan thawh a ni a, Tourism department sum Rs 34,000 hmangin páwn lama eirawngbawl theihna tur choka siam a ni. A ruhrel atan thîr hman a ni a, a chung leh a bang kualah rangva hman a ni thung.

Tarlan tawh angin, Ṭamdila Tourism depart­ment hmunhma enkawltu K Lalrohlua chu mikhual a dawnsawn laiin zu a rûia puh a nih avang leh department hmunhma ṭha tawk lo lai social media-a tarlan a nih hnuah, September 28, 2022 khan insawifiahtir hmasa loin bàn a ni.

Ṭamdil tlawhtu pakhat Nilanjan chuan, Ṭamdila a kal chungchang September 27, 2022 khan Twitter-ah a dah a; Ṭamdil enkawltu a ruih thu te, bual-inah tui a awm loh thu te, thosilèn a ṭeh thu te, street light a awm loh thu te, darthlalang a keh thu te, bed cover a ṭhat loh thute a ziak a, chu'ng thlalakte chu a tarlang a ni.