MC-ah MSME Summit buatsaih a ni

Mizoram sorkar leh Confederation of Indian Industry (CII) chuan nimin khan Millennium Centre chung záwlah State Level MSME Summit an buatsaih a, Commerce & Industries minister Dr R Lalthangliana’n a hawng.

Summit hawnna inkhawm hi CII member Dr Lalrintluanga Jahau in a kaihruai a; Dr R Lal­thang­liana bakah, Plan­ning additio­nal secretary Dr Lalrin­chhana, RBI officer in-charge P Shimrah, NABARD general mana­ger KVSSLA Prasada Rao, RBI regional manager Mukesh Ravi, MRB chairman V Jayachandra leh ZONET Cable TV director Lalnunpuia ten thu an sawi.

MSME Summit-ah hian Loan Mela neih a ni a, NEDFi, MRB, MCAB, SBI, Axis Bank, Punjab National Bank, SIDBI, UBI, Federal Bank, HDFCI, Akash & Associates leh Jewel & Co. ten dawr an siam. Summit hi vawiinah chhunzawma zawh a ni ang.

Minister Dr R Lal­thang­liana chuan, Mizo­ramah industry lian aiin a tê, bul ṭanna tura sum tam tak sên ngai lo chi Micro, Small and Medium Enterprises (MSME) tan ṭhan lenna leh hmasawnna kawng a inhawn zauh thu a sawi a, "Entreprenuer-te'n hei hi fimkhur taka kan ngaihtuah a, hma kan lak tlan a ngai. Bank leh financial institution dangte tel loin hmalak a har a, bul ṭan turin kan ṭan tlana kan thawhho a ngai a ni," a ti.

Bank hotute chu Mizorama kutkawih eizawnna khawihte dinhmun hrethiam tura chahin Minister chuan, "Loan an dil hunah inhawng tak leh ṭha taka lo dawngsawng ṭhin turin ka ngen che u. Chutih rualin, hun kal tawhah bank loan latute'n an rulh ṭhat loh avangin an dahkham chánte an tam a, heng hian mi dang tan kawng a tiping tih hriat a ṭul," a ti a; an thil tih tumah tih tak takna nei turin loan latute a chah bawk.