Hunpuiah hâlpuah khap a ni dawn

Home minister Lalchamliana hoa nimina sorkar hotute leh páwl hruaitute ṭhukhawm chuan, kumin Krismas, Diwali (Puja) leh 2023 kum thar vuakvêtah hàlpuah, hâlmawi leh silai lem a mu kâp chhuak theite khap an rél.

Thuneitute ṭhukhawm chuan, hunpui thleng turah hâlpuah, hâl­mawi, silai lem mu nei chi leh mei­thallâwn (sky lantern)-te chu hriselna atana thil pawi thei a nih avangin khap an rel a; a rang thei ang berin khapna thupek chhuah ni se, an ti.

Dan anga khapna thupek tihchhuah a nih veleh sorkara dan leh thupek kengkawhtu te, khua/veng hrang hranga village/local council leh pawlte'n hma lâk ṭan nghal an rêl a; thupek bawhchhiate chu police leh thuneitute hnena mipuiin an hriattir theih nan Whatsapp kaltlanga thlalak/video thehluh theihna tur phone number siam an rél bawk.

Ṭhutkhawma tarlan danin, kum 2021 khan Krismas leh kumthar vuakvêtah dan bawhchhia mi 26 man an ni a, thubuai 23 ziah luh a ni. Thubuai 23 zinga 18-ah court-in mawhphurtute thiam loh a chantir tawh a, thubuai dang panga chu a la kal mek thung.