Kawngpui tawt lutuk tihziaawm dan zawnga hmalak a ni - CM

Aizawl Sustainable Urban Transport Project (ASUTP) chung­changah nimin khan Mizoram Rural Bank audito­rium-ah workshop buatsaih a ni a, chief minister Zoramthanga‘n hmanpuiin, kawngpui tawt lutuk tihziaawm dan zawnga hmalak a nih thu a sawi.

Chief Minister chuan, khaw­pui ṭhang zel vanga kawng­pui tawt ta lutuk chu tihziaawm dan zawngin kawng hrang hranga hmalak a nih dan a sawi a, "Vawiina workshop buatsaih hian mithiamte rilru chawk tho a, Aizawl tana ṭha tur ber ngaih­tuahna a thlen ngei ka beisei," a ti.

Khawpui hmasawnna chu a chhunga cheng mihringte tan harsatna ni loin, awlsamna a thlen zawk tur a nih thu sawiin Zoramthanga chuan, "Nakin zela ṭangkaina leh awlsamna min thlen thei tur hmasawnna ruhrel din a pawimawh,“ a ti a; kawngpui lunlai tawt lutuk tihthawlna turin project lian tham hrang hrang buaipui mek a nih thu a sawi.

Deputy CM Tawnluia pawhin thu sawiin, "Aizawl khaw­pui ṭhang zel vangin Aizawl Sustainable Urban Transport Project siam a ṭul phah. Mizoram leilungin a zir loh avangin hma­sawnna ruhrel lian tak tak din a harsa. Chuti chung chuan theih­na lai zawn zel a ni," a ti.

Workshop hi UDPA secre­tary Lalmalsawma Pachuau-in a kaihruai a, AMC mayor Lal­rinenga Sailo leh chief secretary Dr Renu Sharma te pawhin thu an sawi.