Governor leh Customs hotute an inkâwm

Governor Hari Babu Kambhampati chu nimin khan Raj Bhavan-ah Customs Aizawl Division hotute a kâwm a, Mizorama Customs hmalakna leh harsatna tawhte a sawipui.

Inkawmnaah hian Customs assistant commissioner H Lala Songate leh inspector pahnih T Paukhochin leh Vipul Rathore ten Mizorama sorkar laipui hnuaia Customs Division hnathawh dan tlangpui leh harsatnate an sawi a ni.

H Lala Songate chuan, an hnathawh pawimawh ber chu India ramrî-ah him taka insumdawn tawnna vil leh dan phal loh thilte a luh loh nan venhimna hna thawh a nih thu a sawi a, "Officer leh staff kan indaih loh avangin duh angin hma kan la chak theih lo. Ramrî-ah dan phal loh thil tawlh rûk, bungrua kan man khawm chi hrang hrang dahṭhatna tur hmun kan neih ṭhat loh avangin harsatna kan tâwk nasa," a ti.

Customs hotute chuan, dan loa bungrua tawlh rûkte hrêk turin Zokhawthar, Hnahlan, Vapàr, Ngúr, Zote, Tlangsam, Farkawn, Sesih, Vangchhia leh Vaphaiahte khauh zawka ramri vil a ṭul thu an sawi.

Foreign post office dinna turin Aizawl Postal Office hotute nen an indawr mek thu te, Lawngtlai Silsury-ah Customs office hawn a ṭul thu te, Zokhawthar Land Customs Station-ah wifi connection, ICES mapping, bank authorisation-te tihfel a nih tawh thu an sawi bawk.

Governor Hari Babu Kambhampati chuan, Mizorama Customs-te'n harsatna tam tak karah theihtawp an chhuah ṭhin avangin lawmthu a hrilh a; an hmalak zelna turah theihtawp chhuahpui a inhuam thu te, harsatna an neihte a hnenah ziaka thlen ṭhin tur leh, a theih ang anga a lo bawhzui sak tur thu a hrilh a ni.