Chhiatna laka invên dan inzirtir

Disaster Management & Rehabilitation (DMR) department leh National Insti-tute of Disaster Management (NIDM), New Delhi-te chuan nimin aṭang khan Assembly Annexe-ah ni thum awh tur, 'Trainers on Mainstreaming Disaster Risk Resilience Measures into Development Planning’ tih thupui zirhona an buatsaih a; DMR minister Lalchamliana'n a hawng.

Hmasawnna atana ruahmanna siam dawna chhiatna thleng palh theite ngaihtuah tel a, tawrhna titlem thei tur záwnga hmasawnna hna thawh chungchang zirhonaah hian Mizoram sorkara department hrang hrang 50 aṭangin officer-te an tel a; ni thum chhungin NIDM leh DMR department-a mithiamte'n thil pawimawhte an zirtir dawn a ni.

Minister Lalchamliana chuan, Mizoram leh India rama chhiatna chi hrang hrang thleng theite ngaihtuah chungin hmasawnna atana hmalaknate kalpui a ṭul thu leh ram tiderthâwng thei leh chhiatna thleng thei tipunlun zawng ni loa ruahmanna kalpui a ṭul thu a sawi.

Lalchamliana chuan, hmasawnna tluantling leh rotling nei turin hmasawnna ruhrel dinna tur hmun thlan uluk leh fimkhur a ngaih thu a sawi a; ram leh khawtlang inpuahchah ṭhain chhiatnaa tawrhna a tihnêp theih thu a sawi bawk.

Training hawnna inkhawmah hian DMR secretary K Lalrinzuali'n inlawmna thu a sawi a ni.