NSS-te'n faina hnatlang an huaihawt

National Service Scheme (NSS) volunteer-te chu nimin zing khan Hunthar Veng leh Rangvamual inkar kawngpui tifaiin an hnatlang a, Aizawl Municipal Corporation (AMC) commissioner Zothanmawia'n a hmanpui. Hmun dang ṭhenkhatah faina hnatlang huaihawt a ni bawk.

Hnatlang hi India sorkarin October thla chhunga Cleanliness Month (Swaachhata) a hman bawhzuina a ni a; Aizawla zirna-in palia NSS volunteer mi 150 vel an tel a, Hunthar Venga Singson Filling Station-ah hawnna inkhawm neih niin, state NSS officer Dr Zirlianngura'n a kaihruai.

AMC Commissioner chuan, faina pawimawhzia leh duh duhna hmuna bawlhhlawh leh leivûng paih phal a nih loh thu a sawi a; Aizawl dái kawngpui kama leivûng paih ṭhin hmu an awm chuan AMC-ah hriattir ṭhin turin NSS volunteer-te a chah.

NSS volunteer-te hian Singson Filling Station leh Rangvamual inkar kawngpui sir leh tuihâwk luankawra bawlhhlawh te, sarâng lam chi paihte an chhar khawm a; bawlhhawlh kg. 200 vel chharin, AMC-in lirthei a ruahman hmangin bawlhhlawh paihna hmunah paih a ni.

Nimin zing vêk khan MZU NSS chuan MZU campus chhung kawngpui dungah leh khelmualah faina hnatlang an huaihawt a, vice chancellor Prof. KRS Sambasiva Rao-in a hmanpui. Hnatlangah hian mi 70 vel an thawk chhuak a, bawlhhlawh kg. 70 vel an chhar khawm a, bawlhhlawh paihnaah an paih a ni.

J Thankima College NSS unit pawhin nimin khan Bawngkawn kàwn leh Brigade Field inkar kawngpuia bawlhhlawhte tifaiin an hnatlang a, 407 truck phur khat bawlhhlawh an chhar khawm a ni. Serchhip College NSS unit-te'n New Serchhip Bazar leh a vel an tifai a, polythene leh plastic bawlhhlawh kg. 50 chuang chhar khawmin an paih.

Nimin vêk khan Kawnpui HSS, Thingsai HSS leh North Vanlaiphai HSS-a NSS volunteer-te pawh an khua ṭheuhah community hall, damdawi-in leh vantlang kawng-puite tifaiin an hnatlang bawk.