Kan MLA ṭha tak takte avangin Kan sorkar leh ngei dawn - Zorama

MNF president Zoramthanga chuan, mi sang tam tak thisena baptist tawh MNF party chu an hnuchhawn thiang lo tih sawiin, kum 2023 inthlanah pawh an MLA ṭha tak takte avangin MNF an sorkar leh ngei dawn niin a sawi.

Nimina Ramhlun Indoor Stadium-a Aizawl North-II MNF Block Conference-ah thu sawiin Zoramthanga chuan, "Pathian leh kan ram tan ti a, mi sang tam tak thisena baptist tawh MNF hi kan kalsan thiang lo a ni, " a ti.

Zoramthanga chuan, "Inthlanpui lo awm leh turah Pathianin bul a ṭanpui MLA ṭha tak tak, beih ngaihna pawh an hriat lohte avangin MNF kan sorkar leh ngei dawn a ni," a ti a; Pathianin kawng chanveah a kalsan dawn lo tih hria a, rinawm taka bei zel turin an party mite a chah.

MNF President chuan ZPM chungchang sawiin, "A hrâm aṭang chuan sakeibaknei emaw tih mai tur kha, sabengtung bawk a lo ni leh ṭhin," a ti a; Congress party chungchangah, "Central leh state-a sorkar kawp, zu chhiah la bawk chunga sum harsatna kan tawh nasatzia kha mipuiin an la theihnghilh lo. Tun dinhmunah Congress chu sawisel pawh a inthlahrunawm lek lek tawk zawk a ni," a ti.

K Vanlalvena, MP pawhin thu sawiin, "Tun sorkarah rin lâwk loh leh beisei lâwk hauh loin, hri léng, ramri buai leh ṭhenawm rambuai avangtein harsatna lian tak tak kan hmachhawn a, chuvang chuan kan hotute'n an intiam ang leh an sawi angin an awm thei lo a ni," a ti a; MNF chuan mi harsa leh ṭanpui ngaite an hriat zel dawn thu a sawi a ni.