BJP anga kalphung fel nei an awm lo - BJP President

BJP, Mizoram Pradesh president Vanlalhmuaka chuan, BJP anga kalphung fel nei political party dang an awm lo niin a sawi a; Mizoram siamṭhat a nih theih nan BJP zawm vek turin mipui a sáwm.

Vanlalhmuaka hian October 18, Thawhlehni khan Sialsuk khuaah thu sawiin, "Mizoramah political party kan awm nual a, BJP anga kalphung fel tak nei erawh an awm lo. BJP party president hi kum thum term a ni a, party hotute'n ṭul an tia an pawtsei a nih loh chuan term khat hman a ni ṭhin. Mizorama party dangah chuan term an nei lo a, an president-te'n inthlan pawh an duh lo a, an peih chhung chu president nih an tum niin a lang. Lalna leh thuneihna chiah an duh tihna a ni," a ti.

BJP-in India ram tihhmasawn a tum tih sawiin Vanlalhmuaka chuan, "Hmasawnna leh miretheite rahbehna laka chhan chhuah kan duh avangin mawhphurtu lian ber Congress party Gandhi Dynasty kaihhruai chu India ram aṭanga nuai chimih hi kan tum ber pakhat a ni," a ti a; central-ah Congress party chu an ding chhuak thei tawh dawn lo nia sawiin, Mizoramah pawh Congress tan din chhuah ngaihna a awm tawh lo niin a sawi.

Mizoram BJP President chuan, Modi-a kaihhruai sorkar laipuiin India mi tu mah thliar loin PM scheme a duang tih sawiin, "Mizorama sorkarna chelh mek MNF-te chuan an party mite duhsakna atan an hmang ṭhin a, hei vang hian kan Kristianna pawh hmuhsit awmah an siam a ni," a ti.