World Cancer Congress-ah tel

National Health Mission (NHM) Mizoram mission director Dr Eric Zomawia chu Geneva, Switzerland-a khawvel pum huap cancer chungchang inkhawmpui lian, World Cancer Congress neih mekah a tel.

October 18-20, 2022 chhunga neih tur World Cancer Congress hi Union for International Cancer Control, Geneva huaihawt a ni a, khawvel ram hrang hrang aṭangin cancer lama inhmang palai 2,000 vel telin, Mizoram aṭangin Dr Eric Zomawia chu Mizoram Population Based Cancer Registry-ah principal investigator a nih angin a tel a ni.

Sorkar thuchhuah tarlan danin, Mizoram Population Based Cancer Registry hian World Health Organisation-in cancer research buaipui tura a din, International Agency for Research on Cancer, Lyon, France nen zirbingna an kalpuiho mek a, an research chu chhûl hmáwr (cervix) cancer venna tura pawimawh HPV vaccine chungchang a ni.