Aizawlah Arogya Mela neih mek a ni

Ministry of Health & Family Welfare hnuaia AYUSH leh Mizoram sorkara AYUSH-te chuan nimin khan Dawrpui Multipurpose Hall-ah Arogya Mela an buatsaih a, Health & Family Welfare minister Dr R Lalthangliana'n a hawng.

Arogya Mela hi October 21, Zirtawpni thleng awh tur a ni a, dawr 20 vel hawn a ni. A thlawna inentirna, zirhona, farmers' meet, medical plant display leh live yoga demonstration-te buatsaih a ni dawn.

Dr R Lalthangliana chuan, Mela-in a tum ber chu Mizoram mipuiah AYUSH vawrh lâr a nih thu a sawi a, "Ramhmul damdawi, India leh Mizoram hmun tam taka awm sa leh natna tihdamna atana ṭha takte Mizo mipui hnena hriattir leh zirtir a ni. Mizoramah thawktu tlemtêin ṭhahnemngai taka an thawh azarah AYUSH pawimawhna leh ṭangkaina kan hmu chho zel a ni," a ti.

Kum 2019 khan Mizoramah AYUSH directorate din a nih thu sawiin R Lalthangliana chuan, "Hma kan sawn hret hret zel a, amaherawhchu, thawktu indaih lohna a nasa. Sorkar laipui aiawha Mela rawn chhimte pawhin min hriatpui se, kan indaih lohna hi Ministry-ah ziaka thehluh a nih angin beng lo varsak turin ka ngen a ni," a ti a; Mizoramah ramhmul damdawi tam tak awmte chu thiamna sang neite'n eizawn nan hmangin, ramhmul damdawi aṭanga siam chhuah neih belh zel dante ngaihtuaha hmalak a ṭul thu a sawi.

Sorkar thuchhuah tarlan danin, Aizawlah khum 50 awmna tur Integrated Ayush Hospital din turin hmalak mek a ni a, khum 10 awmna tur Ayush Hospital, Saitualah din turin rawtna pawm a ni tawh. Lengpui leh North Vanlaiphaiah KVK-te nen ṭangkawpa Medicinal Plant Nursery din tura hmalak mek a ni bawk.