KHAWTHLIR

NCC-in thisen pe
Serchhip College-a NCC chuan nimin khan thisen pek an huaihawt a, Serchhip District Hospital tan thisen unit 22 an pe a, petute mipa 15 leh hmeichhia pasarih an ni.

Heroin man
Champhai police-te chuan October 17, 2022 zan khan Chhungte khaw daiah taxi aṭangin heroin gram 422 an man a; lirthei khalhtu Khawmpuithanga (32) s/o Vallawmliana, Champhai Electric Veng leh a chuanpui Lalrinmuana (25) s/o Lalrinenga (L), Zokhawthar nia inchhálte an man bawk. Heroin hi international market-ah cheng vbc 2.11 man a ni.

Vawk lâk luh khap
Aizawl bawrhsap Dr Lalhriatzuali Ralte leh Champhai bawrhsap James Lalrinchhana te chuan hmun dang aṭanga an district chhunga vawk, vawk sa leh vawk sa aṭanga thil siamte lak luh khapna thupek an chhuah. Thupekah chuan, vawk damlote dah hran vat tur a nih thu te, vawk thi chu thûk takah phûm tur a nih thu te, vawk suat duhte chu AH&Vety hotute hnenah inhriattir tur a nih thute tarlan a ni.

Sava veh khap
Champhai district magistrate James Lalrinchhana chuan, Champhai district-ah air gun/air rifle hmanga sava/nungcha veh leh pêl khap a nih thu a puang. Thupek hi thla hnih chhung hman tur a ni a, thupek zâwm lote chu IPC Section 188 leh Wildlife (Protection) Act, 1972 Section 9 hmanga hrem theih an ni.

Southern Data Centre hawng
Irrigation & Water Resources (IWR) minister C Lalrinsanga chuan nimin khan Lunglei Chanmari-ah Southern Data Centre cum Executive Engineer's pisa a hawng. Southern Data Centre cum EE pisa hi sorkar laipuia National Hydrology Project hnuaia World Bank project kaltlanga ruahman a ni. Planning & design chu Mizoram Technocrats company, Aizawlin cheng nuai 8.08 sengin an siam a; AIE Construction, Aizawlin Rs 2,61,74,875.75 hmangin an sa a ni.