Sesihah Khuado Kût hman a ni Duhlian ṭawng hi mi phuar khawmtu - CM

October 26 khan Zomi hnamte kût, ‘Khuado Pawi 2017’ chu Sesih khuaah hman ṭan a ni a, bialtu MLA TT Zothansanga'n a hawng. Nimin khan chief minister Lal Thanhawla'n a hmanpui bawk. Chief Minister chuan, Zo hnahthlak hnam hrang hrangte'n ṭawng hrang an neih chu humhalh a ṭul thu a sawi rualin, Duhlian ṭawng chu Zo hnahthlakte inpumkhata phuar khawmtu a nih thu a sawi.

CM Lal Thanhawla chuan, "Kan ṭawng leh hnam bil thil kan humhalhna hian kan inpumkhatna leh chhûl khat kual kan nihna hi a tichhe tur a ni lo a, inlâk hran nan kan hmang tur pawh a ni lo. Kan hnam thilte hi tunlai thiamnain a nuai bo kan phal tur a ni lo a, kan hnam bil ṭawngte chhawm nun zel kan tum ang," a ti.

Hemi rual hian Duhlian ṭawng chu Zo hnaththlakte inpumkhata an awm theihna tur a ni tih sawiin Lal Thanhawla chuan, "Kan chak zual zelna tur leh hnam dang hriata chawisan kan nih theihna tura Pathianin min pek, min phuarkhawmtu a ni a, kan chhehvel hnam dangte'n an nei ve lo," a ti a; Zo hnahthlak hnam hrang hrangte'n kût an neihte chu inhlutsak tawn a ngaih thu a sawi.

Impumkhat leh ṭanrual chu Mizo hnam din chhuahna tur leh hnam dangte hmaa Mizo hnam chawi sángtu tur a nih thu sawiin, CM Hawla chuan, Mizoram chu India ram chhung leh páwna ṭhendarh Zo hnahthlak zawng zawng tana Jerusalem a nih thu a sawi a, "Mizoram chhunga chengte phei chu inpui nghaktu kan nih angin, nu leh pa nih kan tling lo a nih pawhin, nu leh pa chan chang kan ni tih kan hriat reng a pawimawh," a ti.

Chief Minister chuan, Mizoram chhunga awmte chu inṭhendarh leh inla hrang tham an nih loh thu sawiin, "Intèl khawm leh inpumkhat hi Mizo hnam chakna tur a ni a ti," a ti a; ram leilung fate'n an mihringpuite chungah chauh ni lo, ramngaw leh nungchate chungah pawh Chanchinṭha an hrilh a ngaih thu a sawi bawk.

Nimina Khuado Kut hmannaah hian MLA T Sangkunga pawhin thu a sawi.

Kut ṭan ní, October 26-a hawngtu TT Zothansanga chuan, pipute sûlhnu leh culture hnutchhiahte chawi nun zel a ngai tih sawiin, "Khawvel hmasawnna leh changkanna kal zelah, hnam tênau leh tlem zawkte chîmrala kan awm mai loh nan zirna leh thiamna kawngah nasa zawk a ṭan lak a ngai a ni," a ti.

Khuado Kûtah hian zaithiamte an zai bakah, hnam làmte entir a ni a; tlaiah ruai ṭheh a ni. Chief Minister hnenah hian Zomite thil phût ziahna, memorandum an hlan a ni.

Khuado Kût hi kum khat chhunga hna thawh aṭanga buh leh bâlte an seng zawh vanga lawmthu sawina leh an hma lam hun lo thleng turte thlirlawkna leh áienna a ni.

Kum khat chhunga an thlai thar hmasak ber ei hmain thlânah thlai chhiah an pe hmasa ṭhin a, chumi awmzia chu boral tawh pi leh pute (malsawmtute) pe hmasa, ‘do’ hmasa tih aṭangin Khuado tih a piang a ni. Khuado Kût ni hmasa berah chhang an dêng a, thlânah mitthi tawhte an pe hmasa (thlai chhiah) ṭhin.

Tun dinhmunah Mizoram pumah Zomi 40,000 vel an awma chût a ni. Zomi Cultural Society (ZCS) chu February 20, 2010 khan din a ni a, unit 21 a awm mek a ni.