Multi-level parking lungphùm phúm

Aizawl Municipal Corporation (AMC)-in Bawngkawna lirthei dahna tur, multi-level parking a sak tur lung­phùm chu nimin zing khan mayor PC Lalhming­thanga'n a phúm.

PC Lalhmingthanga chuan, AMC-in Aizawl khawpui tana hmasawnna turin sum ngah lo mah se, khawpui leh mipuite tan theihtawp a chhuah zel dawn tih sawiin, lirthei dahna tur siam belh zel an tum thu a sawi a; multi-level parking sak tur chu hna thawktute'n ṭha taka an thawh a, a hun taka an zawh a beisei thu a sawi.

AMC Mayor sawi danin, Bawngkawna multi-level parking sak tur hi AMC-in kum hmasa lama hna an thawh ṭhat lawmman, performance grant an hmuh aṭanga thawh tur a ni. Car 35 leh two wheeler 39 léng thei tura ruahman niin, parking atan bik chhawng li hman tur a ni a, kum khat chhunga sak zawh hman tura tih a ni.

PC Lalhmingthanga chuan, sumdawng motor-te leh mimal motor-te dahna hmun tur AMC-in a buaipui zel thu a sawi a; AMC-in tunlai hian Aizawl khawpui lûn laiah kea kalna tur footpath a siam mek thu sawiin, AMC hmalaknate ṭawiawm turin mipui a ngen bawk.

Lung phûm in­khawm­ah hian AMC councillor-te leh thawktute leh Bawng­kawn khawtlang hruaitute an tel a ni.