Winter Festival hman dan tur rel

Tourism department chuan November 23-25, 2017 chhungin Turial Airfield-ah Winter Festival an buatsaih dawn. Winter Festival hi vawi khat hmanna tur a ni.

Winter Festival chung-chang­ah hian nimin khan Tourism department leh a kaihhnawih sorkar department hrang hrang hotute chu Tourism secretary V Lalremthanga hoin a pisah an ṭhukhawm a; festival hman dan tur sawihoin, programme kimchang duang turin Programme Sub-Committee an din.

Tourism department chuan kum tina kût pahnih an buatsaih ṭhin - Anthurium Festival leh Ṭhálfavang Kût te chu a hranpaa hmang tawh loin, kumin aṭangin kaihkawp a, Winter Festival hman turin rel a ni. Sorkar laipui aṭanga kût buatsaihna tur sum an hmuh ṭhin aṭangin, kuminah chuan a zatve chu Chapchar Kut atan an thawh tawh a, a zatve dang chu Winter Festival buatsaih nan hman turin an rel a ni.