Buhfai chhia a ṭhaa thlâk turin phût

Champhai District NGO Coordination Commi­ttee chuan thu­chhuah siamin, Supply department-in Cham­phaiah buhfai ei tlak loh khawpa chhiah mipui ei turin an thawn chho niin an tarlang a, "Inhmusitna leh inthamlohnaah kan ngai," tiin, buhfai ṭha lote chu buhfai ṭhaa thlak thuai turin supplier-te an phût.

Champhai District NGO-te chuan, tun hnuah chuan buhfai ṭha lo, mipui ei atana tlak loh khawpa chhia chu Champhai lamah thawn tawh lo turin an hriattir nghal tih an sawi a, "Buhfai sem tur reng reng hi endik hmasa zel tawh turin Mizoram sorkar kan phût bawk," an ti.

Champhai NGO-te chuan, thla eng emaw zat chhung Champhai mipuiin gas an nghei tawh nia sawiin, "Tun thlengin thu lawmawm hriat tur la awm lo hi hriatthiam har kan ti tak zet. Carrying contractor-te'n Mualkhang kawng chhia chhuanlam-ah siamin, Champhaiah gas an phur duh lo hi kan hre thiam lo. Carrying contractor-te hian an chungah Champhai mipui fân theihna a tawp tawh tih hriain, a rang thei ang berin gas rawn phur chho thuai turin kan phût," an ti a; an thil phût tihlawhtlin a nih loh chuan carrying contractor aṭanga inhnûkdâwk mai turin an hriattir a ni.