UN-in NLUP a ngaihven chhan chu Tihkhawloh an hlauh vang a ni - Prof. Thangchungnunga

Zoram Peoples' Movement (ZPM) Ṭangrual Pawl chuan nimin khan an pisaah chhung inkhawm an hmang a; thu sawitu, ZPM Val Upa Council member Prof. Thang­chungnunga chuan, UN-in NLUP a ngaihven chhan chu tihkhawloh an hlauh vang niin a sawi.

ZPM chhung inkhawm hi Stee­ring Committee chairman Lallian­sawta'n a kaihruai a: Prof. Thangchungnunga chuan, Mizoram sorkar hnathawk pakhat chu University of Minnesota-a inzir tura thlan a nih thu sawiin, "Ani hian Mizorama NLUP kalpui a nih dan University of Minnesota-ah a sawi a, an professor-te'n an hmelhriat phah a ni," a ti.

Prof. Thangchungnunga chuan, University of Minnesota-a professor zingah UN lam mite pawh an awm thu sawiin, "NLUP an ngaihven chhan tak chu tihkhawloh an hlauh vang a ni a, ṭha an tih vang a ni lo. A scheme-in mipui a hruaibo an hlau a ni," a ti a; NLUP chu UN-in a ngaihven angin Congress sorkarin sawi ṭhin mah se, a nihna tak hriat chuan thil hautak a nih thu a sawi.

ZPM Val Upa Council member Rinsanga, IAS (Rtd.) chuan, Mizoram kum 30 state a nih chhungin hmasawnna ruhrel hmuh tlak a awm mang lo niin a sawi a, "Hmasawnna ruhrel siam lama ṭan lak a nih loh chuan hma a sawn tak tak theih loh. Kan sorkar hrawnah sum sem policy leh mahni leh laina hnai inhai vûrna a tel ṭhin, " a ti.

Party ruihchilh bur ni lo, tuna kalphung ringawt ning tawh tam tak an awm tih sawiin Rinsanga chuan, "Sorkara beiseina an neih tawh loh avangin vote hralh duhte an awm ṭhin niin ka hria. A ngaihna hre lote sawn chhuah a nih hunah rorelna dik a awm ang," a ti a; mipuite chu kalphung thar tam tak a la awm tih ring tlat turin a chah.

ZPM-a tel Zoram Revolutionary Front treasurer Rev. C Lianzuala pawhin thu sawiin, "Kan ram kalphung leh politics boruak enin, rawngbawltute pawh kan ding chhuak lo thei lo. Service lai chuan tih vek a rem si lo a, service loh hnuah kan che chhuak a ni. Kan ram rorelna khawlah hian lungawi chiah lo rawngbawltute a tlangpui chuan an ni," a ti.

ZPM general secretary K Sapdanga sawi danin, ZPM-a telte chuan campaign-a an vahchhuahna reng rengah pawl bil flag keng tawh loin, ZPM flag an thawh chhuahpui ṭhin tawh dawn a ni.

ZPM hian Aizawlah beihpui an thlak mek a, veng 50-ah ZPM Local Committee din a ni tawh a, veng 30 dangah pawh din thuai an tum. Aizawl pawn lamah November aṭangin beihpui an thlak dawn a, general headquarters hruaitute chu Lunglei leh Serchhip district tih lohah zawng an feh chhuak dawn a, district pahnihah hi chuan district hruaitute an feh chhuak dawn a ni.