PRISM-in MLPC Act zir chian ṭha an ti
PRISM chuan thuchhuah siamin, Mizorama zu khuahkhirhna dan, Mizoram Liquor (Control and Prohibition) Act kalpui a nih dan zir chian ṭha an tih thu an tarlang a; "Zu zuar leh zu zawrhnate a hmunah kan en a, zu khuahkhirh dan hi ennawn ngai hlein kan hria," an ti.
PRISM chuan, MAMCO, MIFCO leh ZIDCO-ten zu an zuar chu anmahni corporation danah zu zuar tura inziak lut an nih loh avangin Company Act bawhchhiatna a nih thu sawiin, zu an zuar dawn a nih chuan an memorandum siamṭhat a ngaih thu an tarlang. Police battalion headquarters hrang hrang chhunga zu zawrh pawh Police Manual leh canteen dan kalh niin an sawi.
Zu dawrte zing dar 10 aṭanga an hawng chu ṭha lo an tih thu sawiin, "State dangte tih danin tlai dar 2 hnu lamah chauh hawn ve ṭhin ni se," an ti. "MLPC Act hman ṭan tirh lama zu rûi an mante social work hmanga an hrem ṭhin kha tunah hian an kalpui zui tawh lo a, dan an lo siam tawh ang bawhzui leh se kan ti," an ti bawk.