KHAWTHLIR

Tanpuina sem
Commerce & Industries department chuan, nimin khan Khawzawl Joint YMA Hall-ah NLUP leh NEDP ṭanpuin an sem. Ṭanpuina hi Tuichang bial chhunga benificiary-te hnenah sem a ni.

Motor enchhin
Aizawl Municipal Corporation (AMC) mayor PC Lalhmingthanga hoin AMC-in tun hnaia SIPMIU aṭanga bawlhhlawh paihna tur lirthei eng emaw zat an dawnte chu nimin khan enchhin a ni. Bawllhlawh paih motor tharte hi December 2017 aṭanga hman ṭan tum a nih thu AMC hotute chuan an sawi.

Zirlaite Ni
Nimin kha Zirlaite Ni a ni a, Mizoram hmun hrang hrangah hman a ni. School Education minister H Rohluna chuan Kawlbem leh Teikhang khuaa Zirlaite Ni hmanna a hmanpui a, Zirlaite Ni thupui ‘Faina’ chung-chang sawiin, faina leh thianghlimna nunpui a ṭulzia leh faina kawngah mi dangte zirtirtu ni turin zirlaite a chah.

Hall hawng
Khawzawl Electric Branch YMA Hall sak thar chu nimin khan PWD minister Lal Thanzara'n a hawng. Lal Thanzara chuan, Mizoram chu pawl lian tak tak pathum - sorkar, kohhran leh YMA-in a phuar khawm tih sawiin, "Kohhran, sorkar leh YMA-te hi lungthu pathum, ṭangkawp tlat an ni," a ti.

Science zirho
Directorate of Science and Technology leh Mizoram Science Society ṭangkawp chuan, nimin khan khan Aijal Club-ah hmasawnna tluantling nei tura science & technology pawimawhna chungchang zirhona an buatsaih a, Planning minister Lalsawta khuallian a ni.

Hastkala Sahyog Shivir
Sorkar laipuia Directorate of Field Publicity chuan October 26, Ningani khan Samlukhai khuaah 'Hastkala Sahyog Shivir' programme an buatsaih a, IGNOU Aizawl Regional Centre-a regional director Dr SR Zonunthara khuallian a ni. Dr SR Zonunthara chuan, Hastkala Sahyog Shivir scheme chu puantahtu chhungkuate tana hamṭhatna pek theihna a nih thu sawiin, puantahtu chhungkuate tan IGNOU-ah Bachelor of Preparatory Programme (BPP) a thlawnin zir theih a nih thu a sawi. He hunah hian puantahtu chhungkua aṭangin mi pathumin BPP admission an ti nghal a ni.

Tuitla ruang hmu
October 24, 2017-a Khawthlangtuipuia lawng insut vanga tuia tla, PC Lalrokima, Bunghmun ruang chu October 26, Ningani zan dar 8:50 khan Diblibag bulah hmuh a ni a; Ningani zan khan Tlabungah tlaivarpui a ni a, nimin zing khan Bunghmun panpui a ni.

Naupang chil hlum
Nimin zing dar 9:30 vel khan Sesawngah pick-up, Lalromawia khalhin Lalpekhlui (2) d/o Zothangliana, Sesawng Tlangveng a chil a, naupang hi a hmunah a thi nghal nia thu dawn a ni.

Heroin man
Excise & Narcotics department-a Anti-Natcotics Squad chuan nimin khan Aizawlah heroin hawng 1 leh 13 an man a, a neitu a puh Vanlalhruaia (25), Be­thlehem Vengthlang, tuna Zarkawta khawsa mek nia inchhál an man bawk.