Lungawi loin zirlai an pungkhawm; Chief Minister leh MSU an inrem

Mizo Students Union (MSU) huaihawtin nimin khan Aizawl khawpuiah college zirlai 2,000 vel an pung khawm a; college admission fee aṭanga Mizoram sorkarin zirlai pakhata chhiah Rs 1,320 zel a lak ṭhin chu college development fund-ah dah an phût. Tlai dar 5 velah Chief Minister leh MSU-te'n inremna an siam.

Zirlaite chu Vanapa Hall kawtah an pungkhawm a, chumi chhung chuan chawhma dar 11.30-ah MSU hruaitute'n an thil phût bawhzuiin Higher & Technical Education leh Finance department hotute an dâwr a; an thil phût kaihhnawih file chu Chief Minister's Office-ah an thawn a, Chief Minister-in a pawmpui ngai a nih thu an lo hrilh.

MSU president Samuel Zoramthanpuia chuan, an thil phûtah hian kum 2013 aṭangin hma an lâk tawh thu sawiin, "Kum 2017, 2019 leh 2020-ahte sorkarah kan thlen a, tihhlawhtlin a ni lo. Kuminah a vawi nga nan kan thlen leh a, a hlawhtlin hma chuan kan nawr dawn," a ti a; darkar 12 ral hmain Chief Minister-in ziaka a pawmpuina dah a nih loh chuan vawiinah Mizoram pumah lungawi lohna lantir an tum thu a sawi.

Zirlaite hi Vanapa Hall kawtah tlai dar 3:30 thleng an awm a, Chief Minister pawmpuina an la hmuh loh avangin Vanapa Hall kawt aṭangin CMO thleng kawng an zawh. CMO kawt an thlen hian an thil phût file chu Finance department aṭangin CM hnenah a la thleng lo.

File chu tlai dar 4:45 khan Chief Minister hnenah a thleng a, CM Zoramrthanga leh MSU hruaitute an inkawm hnuah inremna an siam a, zirlaite chu tlai dar 5 velah an ṭîn darh a ni.

Chief Minister leh MSU inremna ang chuan, zirlaite fee pek aṭanga sorkarin chhiah a lak chu a kal dan pangngaiin a kal dawn a; chutih rualin, college-te'n development fund atan rualkhai taka an lâk theih turin budget allocation-ah dah a ni ang.

MSU hruaitute sawi danin, Mizorama zirlai 20,900 vel admission fee leh tuition fee aṭangin sorkarin kum tin cheng vbc 2.72 vel a hmu ṭhin. Zirlaite aṭanga sum hmuh chu MSU chuan college development fund-ah dah a, zirtirtu indaih lohnaa zirtirtu rawih nan te, college thuam ṭhat nan leh zirna tihhmasawnna atan hman theih tura dah an phût a ni.

Nimin vêk khan zirlaite chu Lunglei leh district khawpui ṭhenkhatah pawh MSU huaihawtin an pung khawm nia thu dawn a ni.