'Mizo ṭawng ziah dan' tlangzarh

Mizoram Board of School Education (MBSE) buatsaih, 'Mizo ṭawng ziah dan' Fourth Edition 2022, (Revised & Enlarged)' tih lehkhabu chu nimin khan MBSE conference hall-ah School Education minister Lalchhandama Ralte-in a tlangzarh.

School Education Minister chuan, leh­khabu chu Mizo ṭawng ziah danah tute pawhin an ràwn theih tur a ni tih sawiin, "MBSE hnathawhin hma a sawn zel a, mipui beiseina pawh a lian chho zel. Mizo mipuiin in laka rinna an nghah zel theih nan fimkhur, mahni hna ṭheuh thiam leh thurûk vawn kawnga rinawm a pawimawh," a ti.

Hripui léng avanga India leh khawvel pum a buai vanglai pawhin MBSE-in a hun takah board exam an buatsaih thei tih sawiin Lalchhandama Ralte chuan, "Result pawh a chhuah hun dik takah an tichhuak thei a, an chhuanawm hle. Ram tana an hnathawh hi lian tak a ni," a ti a; hripui lên vanglaiin a hun taka exam buatsaih thei leh result tichhuak thei state dang an awm lo niin a sawi.

MBSE secretary Sarah Lalengzami Pachuau sawi danin, MBSE hnuaia Mizo Language Committee-in kum 16 chhung Mizo ṭawng tihmasawn turin hma a la a, lehkhabu an tihchhuah thar pawh Committee kutchhuak a ni.
Lehkhabu kalphung leh buatsaih dan sawifiahtu Mizo Language Committee convener Prof. RL Thanmawia sawi danin, lehkhabu chu hlawm hnih, thumal ziah zawm tur leh zawm loh tur sawi chianna leh, tute pawhin an ràwn theih tur dictionary anga hman theih thumal ziah zawm chi leh zawm loh chi dah khawmna a ni.