ZPM hruaitute'n Ṭamdil an enfiah

ZPM party hruaitute chuan an vice president Lalthansanga hoin nimin khan Ṭamdil an tlawh a, kumin chhunga cheng nuai 19.72 sénga Ṭamdila Tourism department hmun chei dan an enfiah.

ZPM chuan, Ṭamdil chu kumin 2022 chhungin cheng nuai 19.72 séngin ṭum hnih chei ṭhat ni tawh mah se, inkalpawhna kawngte a khîk bakah, thil dang ṭha tawk lo eng emaw zat a awm thu an tarlang a, "Boat hman theih pakhat mah awm loin a chhe fai vek a, khualbûk (cottage) pakhat hluihlâwn niin, pakhat phei chu balcony a khi nasain a hlauhawm hle. Cafeteria/hall darthlalang kehte pawh a la awm a ni," an ti.

Lalthansanga chuan, "Cheng nuai 19.72 zet sénga chei ṭhat a ni chung leh ngam zawngte laka kutthlak a nih hnuah pawh harsatna sutkian a la ni lo fo hi pawi kan tiin mak kan ti hle a ni," a ti.

Ṭamdil tlawhtu hnam dang pakhatin social media-a thu leh thlalak a post hnua thawktu bân tak aiawh turin chowkidar dah a nih thu leh, khualchhawn dah tel a nih loh avangin hnam dang khualzinte'n ṭawng chungchangah harsatna an tâwk tih a taka an hmuh thu Lalthansanga chuan a sawi bawk.