Dr K Beichhua'n sorkar laipui a dàwr

Social Welfare minister Dr K Beichhua chuan nimin khan New Delhi-ah Union Women & Child Development minister Smriti Irani leh Ayush minister of state Mahendra Munjapara te a kâwm a; Mizoram kaihhnawih thil pawimawhte a sawipui.

Dr K Beichhua hian, Smriti Irani hnenah anganwadi 510 siamṭhatna tur leh a thar eng emaw zat hawn belh tur te, mahni in chhunga hmeichhe hleilenna tuarte tlan khawmna in, one stop centre thar panga dinna tur te, observation home building leh staff quarters sakna turte leh centre of excellence for women & child development project an siamte tihhlawhtlinsak turtein a ngen a ni.

Smriti Irani chuan, project thlente leh ngennate chu a rang lama tihhlawhtlinsak a tum thu Dr K Beichhua a hrilh tih sorkar thuchhuah chuan a tarlang.

K Beichhua chuan, Mahendra Munjapara hnenah September 2022-a Mizorama a zin ṭuma a biala Ayush damdawi-in dahsak tura a lo tiam tawh chu a bawhzui a; Ayush Minister chuan, Amotlah khuaah khum 10 awm theihna tur Ayush damdawi-in detailed project report December 2022 ral hmaa thehlut turin a lo hrilh.

Mahendra Munjapara hian September 2022-a Mizoram a tlawh ṭumin Dr K Beichhua hnenah a bial chhunga Ayush damdawi-in siamsak a tiam a ni.