Electric current man vanga thihna chhui ṭan
Lawngtlai district-a Rúlkual khuaah October 14, 2022 khan electric current man vangin mi pathum an thi a, mi pahnih na takin an hliam bawk a; thil thlen dan chhui chiang tura din member pathum awmna Inquiry Commission chuan nimin aṭanga khan chhui chian hna an thawk ṭan.
Inquiry Commission hi Power & Electricity superintending engineer H Zonunsanga'n a kaihruai a, nimin khan khawtlang hruaitute an kâwm a ni.
Central YLA, Paithar Group YLA leh Rulkual khawtlang chuan thuchhuah siamin, sorkar chu thil awm dan chhui chiang a, hrem ngai an awm chuan hrem tur leh, vanduaina tâwkte zangnadawmna pe tura an duh thu an lo tarlang tawh a ni.
Tarlan tawh angin, October 12, 2022 khan Rúlkual khaw ram chhung, khua aṭanga km. 4 vela hláah thing tluin electric hrui a vaw chat a; Power & Electricity department-a thawkte chuan khawtlang punin, October 14 khan electric line chhia an siam a ni.
Electric hrui chhia an siam mek laiin current a kal thut a, a hmunah mi pathum - Samuel Lalthianghlima, Lalramdinpuia leh Lalrinchhana te an thi a; mi pahnih na taka hliamin Lawngtlai District Hospital-ah enkawl tura hruai nghal an ni.