Politics hi firfiak taka kalpui tur a ni lo-MNYF President

Mizo National Youth Front (MNYF) chuan nimin khan Mizo Hnam Rûnah extended meeting an nei a; kaihruaitu MNYF president L Thangmawia chuan, politics chu firfiak taka kalpui tur a nih loh thu a sawi a; kum 2023-ah MNF chu an sorkar leh ngei a rin thu a sawi bawk.

L Thangmawia chuan, Politics chu mipui tana thawhna tur a nih thu sawiin, "Firfiak taka kalpui tur a ni lo. Tunlaiah firfiak taka politics kalpui, ram tana ṭangkaina awm miah lo, mi mimal nun thlenga phuahchawpa rin thu huai taka sawi chíng party an awm thar a, a pawi hle a ni," a ti.

MNYF president chuan,"Kum 2023 inthlanpui neih turah Pathian hruainaa kum 60 chuang mipui tana ding tawh MNF party hi Pathianin sorkarna hun a la pek belh ngei dawn a ni," a ti. MNYF President chuan, "Mizoram chief minister hial ni thei tura chung lamin hun a pekte nuihza siam nana hmang a, deusawh leh hmusit taka ṭawngkam chhe tinrenga vawm duh khawpa rilru chhe pute hnenah Pathianin sorkarna vawi khat mah a pek ka ring lo," a ti a; chu chu kum 2023 inthlan result-ah a taka a lan tur thu a sawi.