VICC sakna tur lungphùm phúm

Transport minister TJ Lalnuntluanga chuan nimin khan Hlimena Transport department ramah Vehicle Inspection and Certification Centre (VICC) sakna tur lungphùm a phúm a; hmasawn zel tura Mizoramin a mamawh ber chu inhmangaih tlànna leh thawhhona ṭha nia a hriat thu a sawi.

Lirthei khalhtu leh lirtheia chuangte himna turin India rama state leh union territory zawng zawngah VICC dah tura ruahman a ni a, Mizoramah pawh buaipui mek a ni. Mizorama VICC dinna atan sorkar laipui chuan cheng nuai 1,550 a dah a, sorkar laipuiin 90% tumin, Mizoram sorkarin 10% a tum dawn a ni.

Sorkar thuchhuah tarlan danin, VICC chu khawl leh hmanraw changkang tak taka thuam a ni dawn a, mit lâwnga lirthei him leh him lo endik ṭhin chu computer leh kháwl hmanga endik ṭhin a ni ang a, thil chi hrang hrang endikna atan hman theih tur a ni. Centre sak leh a hmunhma siam hna thawk turin Central Institute of Road Transport, Pune hnuaiah e-tender chhuah a ni a, hna thawk turin Vinco Constructions thlan a ni.

Minister TJ Lalnuntluanga chuan, mipui tana ṭangkai tur Vehicle Inspection and Certification Centre sakna tur bul ṭan a ni dawn ta chu lawmawm a tih thu a sawi a; state upa zawk leh changtlung tawhte ûm pha turin Mizoramin ṭan a la tih sawiin, "Transport department bikah state changkang zawkte tih dan tun hnaiah kan ûm pha chho thei hi a lawmawm hle a ni," a ti.

TJ Lalnuntluanga chuan, "Hmasawn zel tura kan ramin a mamawh ber nia ka hriat chu inhmangaih tlànna leh thawhhona ṭha a ni," a ti a; hmasawnna rualkhai awm turin inhmangaih leh inlungrual taka ke pên tlân a ngaih thu a sawi.

Lungphûm phùmnaah hian bialtu MLA Prof F Lalnunmawia pawhin thu a sawi a ni.