Cong ṭhalaiin AMC-ah tax zawtfiah

Mizoram Pradesh Youth Congress Committee (MPYCC) hruaitute chuan nimin khan Aizawl Municipal Corporation (AMC) pisa-ah property tax chungchang an zawtfiah.

Tun hnaia property tax rate thar avanga Aizawl khawpui chhung tinten property tax sang tak pek an ngaih mek thu AMC hotute hnenah hian thlenin MPYCC chuan, vawi lehkhata tax sang thut lak hian mipui a nghawng nasat dawn avangin mipuite phurrit ziaawm zawnga hma la tur leh an tipung dawn a nih pawhin mipuite hnenah awareness ṭha zawk leh kimchang zawka kalpui turin an duhthu an thlen a ni.

MPYCC chuan AMC-in vawilehkhatah property tax rate an tisang thut nia tarlangin, "Covid-19 avanga ram mipuite ei leh bar zawnna kawngah nunphung pangngaia kan la awm kim vek theih loh laia hetianga property tax a let 3/4 vel laia tihsan a ni hi tihhniam dan kawng zawng turin AMC-a MNF sorkar kan phut a ni," an ti a, a ṭulna apiangah mipuite thlavang hauhin ke an pen zel dawn thu an tarlang.