KHAWTHLIR

Thisen pe
T Romana College NSS chuan nimin khan an college-ah thisen pek an huaihawt a, Civil Hospital, Aizawl tan thisen unit 70 an pe a, petute mipa 61 leh hmeichhia pakua an ni. Serkawn Higher Secondary School NSS pawhin Christian Hospital tan thisen 47 unit an pe a, petute mipa 38 leh hmeichhia pakua an ni.

Thiamthil inzirtir
Labour, Employment, Skill Development and Entrepreneurship (LESDE) department leh T Romana College chuan October 19-20, 2022 khan 'Skill development and sensitization workshop' an buatsaih a, LESDE director Angela Zothanpuii'n a hawng. Ni khatnaah hospitality and tourism chungchang zirlaite zirtir an ni a; ni hnihnaah chhang ur leh siam, pangpar khâwi leh thlalak chungchang an zirtir a ni.

Scho. pe chhuak
Mizoram Scholarship Board chuan nimin aṭang khan Post Matric Tribal Scholarships pawisa an pe chhuak ṭan. Scholarship pek chhuah hi kum 2021-22 atana third instalment la dawng lo, technical course zirlaite tan a ni a; sum chu Ministry of Tribal Affairs chuan October 4, 2022 khan Mizoram sorkar hnenah a pe tawh a ni.

Tlingte chawimawi
Mizoram University-a Politicial Science department chuan MZU Political Science department-a zir ṭhin, MPSC Combined Competitive Examination, 2022-a tlingte chawimawina hun nimin khan an hmang. Chawimawina leh inkawmhona hun hi Prof. Jangkhongam Doungel-a'n a hmanpui a, MCS leh MPS ni tura tling mi palite an chawimawi a ni.

MUP-in an dem
Tuikual North MUP chuan thuchhuah siamin, an member B Zalawma, a in chhunga Daniel Sailo s/o Lalsailova Sailo-in kut a thlak chu an dem tak zet thu an tarlang a, "Daniel Sailo, MCS officer hi Mizoram sorkarin a phu tâwk hremna pe ngei se kan ti. Tun hnuah kum upate zahpah lo taka kut thlakna leh hmuhsitna hi thleng tawh lo se kan ti," an ti.