Cancer enkawlna kawngah tih tur la tam - Health Minister

12th Annual Conference of the Association of Radiation Oncologists of India, North East Chapter (AROICON NE) chu Inrinni khan Hotel Regency-ah neih a ni a, an hun hmanpuitu Health minister Lal Thanzara chuan cancer natna enkawl kawngah tih tur a la tam thu a sawi.

Health Minister chuan 12th AROICON NE, Aizawl-a neih a ni chu lawmawm a tih thu sawiin, "Conference hrang hrang neih tawh ṭhin pawh a hlawkthlak ṭhin hle. Hun lo kal turah pawh hetiang conference chu doctor-te'n an hman ṭangkai bakah an thiamna tibelhchhahtu a nih a, mipuiten an thiamna chu an chhawr zel ka beisei," a ti.

Lal Thanzara chuan cancer natna enkawl leh zirchiannaah hma kan sawn viau chungin, cancer dona kawngah tih tur a lam thu sawiin, "Kan taksa hrisel leh fimkhur zawka kan vawn hian natna dona kawngah min pui thei a ni," a ti a, tun hma ngaihtuah chuan cancer natna thlen dan leh enkawlna kawngah mipui an bengvar tawh thu a sawi.

Conference hawn inkhawmah hian AROI-NE Chapter president Dr. NK Kalita leh Health & Medical Education director Dr. T Lalhmangaihi te pawhin thu an sawi a ni.

Conference-ah hian India ram hmarchhak state hrang hrang bakah India ram hmun dang aṭangin cancer enkawltu doctor-te'n cancer natna chungchang inrawnkhawmna leh sawihona hun an hmang a ni.