Referral Hospital-ah dept. pathum Minister KS Thanga'n a hawng

State Referral Hospital, Falkawna department pathum - Opthamalogy (Eye) OPD, Physical Medicine & Rehabiltitation leh Labour Room-te chu Inrinni khan minister KS Thanga'n a hawng.

Department pathum hawn puala inkhawm buatsaihah KS Thanga chuan medical college dinna tur atana a huphurhawm lai ber hna thar 629 lakna tur chu Cabinet-in a pass tak thu sawiin, "Department hrang hrang pawhin indaih lo an intih laia, medical college atana hna thar 629 lak hi sorkar tan pawh a cho awm loh viau," a ti a, Chief Minister leh Finance Minister kaihhruaina hnuaia sum dinhmun siamṭhat a nih avangin hna thar hi lak theih a nih thu a sawi.

KS Thanga chuan MLA a nih hma pawhin State Referral Hospital chu a tlawh ve ṭhin thu sawiin, "Broiler ar vulhna aṭanga tun dinhmun a thleng hi a lawmawm hle. Ar vulhtute kha an demawm lo a, sorkar berin hman ṭangkai ngaihna a hriat si loh chuan building ruak an lo luah kha an dem awm loh a ni," a ti.

Inkhawm kaihruaitu medical superin­tendent Dr. Lalhmuchhuaka chuan State Referral Hospital-ah medical college din a nih ngei theihna atan an inbuatsaih zel tih sawiin, "Medical Coucil of India aiawhte hi an fimkhur em em a, mahse tun dinhmunah chuan eng hunah pawh lokal se medical college atana an pawh ngei kan ringin, beisein sang tak kan nei a ni," a ti a, thawktute pawh an phur tawh thu a sawi.

KS Thanga'n a hawn tak Opthamalogy (Eye) OPD, Physical Medicine & Rehabiltitation leh Labour Room-ah te hian NEDP sum hmangin hmanraw engmawzat dah thar a ni. Eye OPD tih loh hi chu a nihna ang tura hman theih nghal a ni a, Eye OPD ah erawh thil tihfel ngai a la awm avangin November thla tawp lamah bak a inzai theih beisei a ni lo.

Mizoram sorkar chuan State Referral Hospital tihchangtlunna atan hian NEDP aṭangin sorkar kum liam taah cheng vbc. 28 leh sorkar kum kal mekah cheng vbc. 15 a dah a ni.