AMRUT-a hna thawh nan vbc. 140.45

Khawpui tihhmasawnna tur scheme pakhat, Atal Mission for Rejuvenation and Urban Transformation (AMRUT) chu Mizoramah kalpui mek a ni a; kum nga, kum 2015-2020 chhunga hmalakna turin sorkar laipui chuan Mizoram tan cheng vbc. 140.45 hman a phalsak. AMRUT-ah hian Mizoram chu hmarchhak state zingah a tiṭha ber tih tun hnaia Guwahati-ah review meeting-ah an tarlang.

AMRUT hi June 25, 2015-ah India ram khawpui hrang hrangah hawn a ni a, Mizoramah pawh kalpui nghal a ni. Scheme hian thil tum hlawm lian tak panga a nei a; chungte chu - tui thianghlim hnianghnara pek (water supply), tuihâwk luankawr ṭha siam, transport system ṭha siam, green space & park leh septage management-te a ni.

Scheme bul ṭan nan State Level Improvement Plan (SLIP) siam a ni a, mission period 2015-2020 chhung atan siam a ni. State-in SLIP a siamte chu sorkar laipuiin a pawm hnuah kum tin State Annual Action Plan (SAAP) siam a ni a; hmalakna atan Ministry of Housing & Urban Affairs chuan Mizoram tan cheng vbc. 140.45 a phalsak tawh a, sum hman tur aṭanga 90% chu Central tum tur niin, state sorkarin 10% a tum ve a ngai.

AMRUT hnuaiah hian Aizawl khawpui mipuite tui thianghlim hnianghnar zawka pekna turin kawng thumin hmalak mek a ni a; chungte chu - Reduction of Water Leakages in Water Distribution System Phase-I, Improvement of Aizawl Water Supply Scheme Phase-II leh Improvement of Aizawl Water Supply Scheme Phase-III tihte a ni.

Mumal zawka tuihâwk luantirna turah, 'Storm Water Drainage of Aizawl Phase I, II leh III-te Aizawl khawpui chhung hmun hrang hrangah kalpui mek a ni a; tuihâwk luan kawr leh road side drain siamna tur project cheng vbc. 57 man siam a ni.

Kum thum chhunga sum hman dan tur
Kum Centre State Total
Share Share
2015-16 Vbc. 36.50 Vbc. 4.05 Vbc. 40.56
2016-17 Vbc. 42.00 Vbc. 4.67 Vbc. 46.67
2017-19 Vbc. 47.72 Vbc. 5.30 Vbc. 53.02