Bairabi leh Sairang inkar rel kawng siam hna chhunzawm a ni

Fur ruahtui tla a tlem tak deuh avangin Bairabi leh Sairang inkara rel kawng kms 51.25-a thui, contractor hrang hrangin an siam mek chu ngawrh taka chhunzawm ṭan leh a ni.

Thu dawn danin fur ruahtui tlak nasat lai khan hnathawh theih a nih loh avangin ngawrh taka lei verh a ni a, he rel kawngin a pal tlang tur hmun 23-a lei verh tlang ngai chu verh zawh vek a ni. Tunah hian lei verha rel a tlan tlang theih nana lei verh chhuat, concrete-a chhun te, a sir tawn tawna tuihawk luankawr siamte leh a sir leh chung lam tichak tura concrete bang siamte thawh mek a ni a, lei verh laia hnathawh tur awm zawng zawng zo fel turin tunah hian hnathawh tur 25% vel a la awm.

Rel kawng kalna tur lei laih leh rel station siamna tur hmuna lei laih chu 65% vel zawh fel a ni tawh a, rel kawng siamna tura mimal ram lak, chinfel tawh chu 89% a ni.

Rel kawng siam mekah hian Bairabi aṭanga Sairang thlengin rel station pali siam tur a ni a, chungte chu Hortoki, Kawnpui, Mualkhang leh Sairangah te a ni.

Lei verh 23 awm zinga a sei ber chu Bairabi bula mi km 1. 800 vela sei a ni a, he hna hi Naik Infra. Project Ltd.-in a thawk a ni.

Lei dawh tur zawng zawng sei zawng belhkhawm hi km 7 leh metre 27 a ni a, leiverh 23 sei zawng belhkhawm hi km 9 leh metre 9 a ni. Bairabi leh Sairang inkara rel kawng siamna atana kum 2008-09 a sum ruahman hi a vaiin cheng vaibelchhe 2,384.33 a ni a, hei hi ennawnin revised estimate, cheng vbc. 4000 siam a ni tawh

Rel kawng siam nan kumin March thlenga sum hman tawh zat chu cheng vbc. 1,234 a ni a, hman theiha zawh fel hun tur chu March 2020 a ni.