KHAWTHLIR

Kum 500 tlin lawm
Presbyterian Church of India General Assembly buatsaihin, kohhran siamṭhat (reformation) kum 500 tlin lawmna chu KJP Synod Sepngi hnuaia Mawkhar Presbyterian kohhranah neih mek a ni a, Mizoram Synod aṭang pawhin mi 49 an kal. Reformation kum 500 tlin lawmnaah hian Synod hrang hrang aṭangin zaipawl leh palai ṭhahnem tak an tel a ni.

Baptist khawmpui
Baptist Church of Mizoram (BCM) hnuaia inkhawmpui lian ber dawttu, Area Baptist Council (ABC) chu Mizoram hmun hrang hrangah October 27 khan ṭan a ni a, nizan khan a ṭiak. ABC khawmpui hi hmun 14 ah neih a ni a, Inrinni khan rorelin, nimin chawhma khan kohhran upa thar 127 te nemngheh an ni a, chawhnuah Lalpa Zanriah Sakrament ṭheh a ni.

Zu dap runpui
Excise & Narcotics department, Vairengte Station-a mite chuan tun hnai khan dan kalha zu siam leh zuar dap runpui an nei a, Chhimluang leh a chhehvelah a ruka zu siamna hmunpui an hmu chhuak a, zu bilh lai tin 340 leh a siamna atana hman bungbel eng emaw zat an tichhia a ni.

In kang
Nimin zing dar 9 vel khan Serchhip Chanmari Venga Lallchawimawia in Assam type chhawng hnih chu bungraw chuh hman lohin a kang ral. Serchhip aṭanga thudawn danin, Lalchawimawiate pafa thum chu an chhungte inah tukṭhuan eia an kal laiin in hi a kang a ni. In kang hnuhmate seng-hawi hna thawh nghal a ni a, Serchhip DC chuan hnatlang thingpui lum nan Rs. 2000 hlan.