AR-te'n lirthei an endik chhan chhui turin DC hriattir a ni

Home department chuan tun hnai khan Champhai DC hnenah lehkha thawnin, Assam Rifles-te'n Champhai pan tur lirtheite Khankàwnah lo tiding a, an endik ṭhin chhan zir chiang turin an hriattir.

Home department chuan, Champhai DC hnena hriattirna an pekah hian, AR sipaite duty chhan endik tura hriattirna chu Chief Secretary duh dan anga tih a nih thu an tarlang a, "Khankawna AR-te'n lirtheite endik a, an lo chhinchhiah ṭhin chhan leh an duty dan kalphung zir chiang turin kan duh che a ni. Chu bakah, hetianga thil ti tur hian district administration lamin phalna in pe em?" a ti.

Chhui chianna report chu July 27, 2020-ah thehlut turin Champhai DC chu hriattir a ni a, July 27 chu nimin kha a ni. Hetih lai hian, Home department lehkha chu Champhai DC lamin an hmuhna a la rei loh avangin report an la thehlut lo nia thu dawn a ni. Hetih lai hian, Assam Rifles aṭanga thu dawn danin, an duty chhan ber chu Myanmar aṭanga ruihhlo leh dan phal loh thil Mizorama lut tur ven nan Khankawn paltlangtu lirtheite chu endik vek a ṭulin an hria a ni.