Police tur lak mekah a titha apiang lak a ni ang - HM Zira

Home minister R Lalzirliana chuan, police constable tur lak mekah induhsakna uchuak a awm dawn loh thu a sawi a, "A tiṭha ṭha lak a ni ang," a ti.

Home Minister hian nimin khan a pisaah police lak mek chungchangah video recording an nei a, Mizo mipuite'n hna an duhin, ṭhalaite'n hna an zawng nasa tih sawiin, "Police kan lak dan tur hi Mizo mipuite'n hria se ka duh. Tun hmaah lak danah dik lo a awm tih hretu kan ni a, nasa takin ka sawisel ṭhin," a ti a, a sawiselte anga awm a tum loh thu a sawi.

Hna duhna leh inchuhna a nasat thu sawiin R Lalzirliana chuan, "Police lama kan hotute nen kan sawiho dan a nih bakah, ka ngaihdan chuan pawl leh mimal ni lo, Mizo mipuite tana ram rawngbawlnaah hian lut ka ni. Tling lo tlin luihtir keimahah chuan a awm lo ang. Ka thawhpuite pawh hian hminghliauna an neih ka ring lo. Induhsakna uchuak a thlen ka ring lo," a ti.

Home Minister chuan, police lak danah dik lo a awm nia hriate tan complaint theih a nih tur thu sawiin, "Result zawng zawng dahṭhat vek a ni ang a, dik veka chhánga inngai tling si lote tan complaint theih a ni dawn. An chhanna kan enho dawn a ni," a ti a; dik leh ṭha vek si, dik lo anga pawm an awm chuan action lak theih a nih tur thu a sawi.

Police tur lak mekah hmeichhe tan quota siam a nih thu sawiin R Lalzirliana chuan, "Unarmed branch-ah bik sorkar laipui duh dan chuan 35% hmeichhe tan dah tur a ni. Mahse, police kan lak tur hi a tlem si a, unarmed branch-a mi 75 lak thar an ni dawn a, heta ṭang hian hmeichhia 25 vel lak tum a ni," a ti.

HM Zira chuan, ṭum dangah chuan police lak a nihin sport person, home quard, ex-servicemen, etc. tan quota siam a nih ṭhin thu sawiin, "Kan lak tur a tlem si a, quota kan dah dawn a nih chuan a zo vek dawn si a, kan dah thei ta lo a ni," a ti a; ex-servicemen bik erawh sorkar laipuiin a ngaih pawimawh em avangin 5% quota dah a nih thu a sawi.

R Lalzirliana chuan, pawl 8 pass chin dil theih armed branch-a diltu zingah post graduate 57, graduate 879, HSSLC 3,098, HSLC 3,277, class-VIII 3,295 leh diploma holder 19 an awm thu a sawi a, "Pawl 8 pass chin tan tih a nih angin, a zir sang tan chance a ṭha chuang lo. Pawl 8 pass chin chhan tura question set a ni. A ti ṭha ṭha lak a ni ang," a ti.

Home Minister sawi danin, police consta­ble - armed constable 375 leh unarmed con­sta­ble lak phalna chu September 1, 2017 khan sorkar aṭangin an hmu a, September 26-ah DIG kaihhruaina hnuaiah Recruitment Board din a ni. Recruitment Board-in police lak hna an buaipui dawn a, fair tak leh dik taka ti tura hriattir an ni.

Thiam dan leh theih dan inangah chuan police thi tawh leh châwl tawh fate bakah sorkar hnathawk awm lohna chhungkua aṭanga tlingte duhsak an ni dawn a; quota hran mumal siam ni lo mah se, sports person leh NCC atan erawh merit mark siam a ni.

Home Minister hi DGP Thianghlima Pachuau, IGP Zorammawia leh DIG (Training) C Laldina ten an ṭawiawm a; anni hian tun thleng chuan chung lam aṭanga an duhsak zawng thun tura tihna an la dawn loh thu an sawi.