Covid-19 vei sipai mi 156 Zinga 25 an chhuak tawh

Mizorama Covid-19 vei hmuh chhuah tawh mi 361 zingah sipai 156 an tel a, chu chu vei tawh zat aṭangin 43.21% a ni. Hriat theih chinah, sipai zinga hripui vei hmuh tawh 156 zinga 33 chuan an vei tawh lo (negative tawh) a, mi 25 chhuahtir an ni tawh.

Mizorama sipai Covid-19 vei hmuh chhuah tawh dan chu - Aizawl district-ah 128, Lunglei district-ah 24, Serchhip district-ah pahnih leh, Champhai leh Kolasib district-ah pakhat ve ve a ni. Sipai mi leh sa hripui vei hmuh tawh mi 156 zingah BSF mi leh sa tam berin, mi 70 an ni a; Assam Rifles mi 50, National Disaster Response Force (NDRF) mi 32 leh Counter Insurgency & Jungle Warfare School, Vairengte lam mi pakhat an tel. Assam Regiment-a awm Mizo sipai tun hnaia rawn haw mi pathum - Aizawl district mi pahnih leh Champhai district mi pakhat an tel bawk.

Mizorama Covid-19 vei sipai mi 156 zinga 25 chu chhuahtir an ni tawh a, chungte chu - Aizawla NDRF mi 12, Assam Rifles mi pakua leh Lungleia BSF mi pali an ni.