India tana gold medal dawngtu Lalfakmawii chawimawina hlan

Bulgaria-a Interna­tional Senior & Youth Women Boxing Cham­pion­ship-a kg. 81 cate­gory-a India tana gold medal latu Lalfakmawii Ralte, Vaivakawn Zohnuai chu nimin khan Governor Lt.Gen. Nirbhay Sharma leh Sports & Youth Services minister Zodintluanga ten lawmpuina an hlan.

Raj Bhavan-a lawm­puina inkhawmah Gover­nor chuan, Lalfakmawi chu hlawhtlinna a chan chu duhtâwk mai lo a, a aia sang zawk thlen tum tur leh ṭhalaite entawn tlak ni turin a chah a, "Tlang rama boxer-te chu an chawrchhuahnain a zir avangin an tuarchhel a, an zuan zâng bik a ni. Mizote hian kan theihna kan hre chiang tawk lo a, kan thlen phak tur ang kan thleng lo ṭhin a ni," a ti.

Sports Minister pisaa Lalfakmawii lawmpuina hlan inkhawmah Zodin­tluanga chuan, sor­karin infiammite chhawm­dawlna tur dan mumal tak a neih thu sawiin, "Natio-nal leh international level-a tel phakte lawmpuina pek dan tur a awm vek a. Medal dawngte tan a hranpa lawmpuina siam leh a ni. India ram aiawha tel hrim hrim hian dawn tur an nei," a ti a; lawmpuina pek dan mipuite'n an hriatthiam ṭhin loh thu a sawi.

Sorkarin a lawmpui bikte chu India aiawha medal dawngte an nih thu sawiin, "India tana medal dawng an awm hian a lawmpuina programme siam a ni ṭhin. India aiawh ni mah se, result ṭha an neih loh chuan a lawmpuina hun siam loin, dan anga an dawn tur kan pe mai," a ti.

Lalfakmawii Ralte hi Mizoram Boxing Asso­ciation (MIZBA) hruai­tute'n an ṭawiawm a ni.