Aizawlah sipai lâk rûnpui nei dawn

December 1-6, 2017 chhungin Aizawlah sipai lâk rûnpui neih a ni dawn a, November 15 thleng internet online hmangin dilna thehluh theih a ni.

Army Recruitment buaipuitute'n press release-a an tar­lan danin, sipai lakna hi December 1-6 chhungin Rajiv Gandhi Stadium-ah neih a ni dawn a, mipa tan chauh a ni ang. Physical test-a tlingte tan January 28, 2018-ah written exam neih tur a ni.

Dilna (application) chu online hmang chauha tih theih a ni a, website www.jojnindianarmy.nic.in ah October 2, 2017 aṭang khan registra­tion tih theih a ni tawh a, November 15 thleng tih theih a ni ang. Army recruitment rally-a tel turte chuan Aadhaar card an neih ngei a ngai a, online-a application thehlutte hnenah November 16-25 chhungin an email-ah admit card thawn a ni dawn a, admit card chu laser printer-ah print chhuakin, physical test tih hunah ken tur a ni.

Rally neih hunah leh­kha pawimawh ang chi zawng zawng copy hnih ṭheuh ken tur a ni a, hriat chian duh nei tan Army Recruiting Office, Aizawlah emaw, tele­phone no. 235116 leh 2351518-ahte zawhfiah theih a ni.

Thuchhuah chuan, sipai lâk rûnpui neih turah hian Mizoram aṭangin dilna thehlut an la tlem hle tih sawiin, Mizo ṭha­laite chu a tam thei ang ber intlar turin an ngen a; rally-ah hian tattoo nei tan inlan buai a ngai lo tih an sawi bawk.