September 2017-a tobacco cessation Clinic pantu 26.22%-in vaihlo an sim

Ministry of Health and Family Welfare leh Global Adult Tobacco Survey (GATS) 2009-2010-a a lan danin, Mizoram chu vaihlo zûk leh hmuam ti nasa ber state a ni. Chutih laiin, kumin September thla chhung khan vaihlo zûk leh hmuam ti sim tuma tobacco cessation clinic pantu zinga 26.22%-in zûk leh hmuam an sim niin Mizoram State Tobacco Con­trol Society (MSTCS) chuan a tarlang.

MSTCS hotute chuan, India ram pum huapa vaihlo chungchanga zirchianna, national data thar tihchhuah a ni tawh a, zirchianna hmasa aiin zûk leh hmuam ti 6%-in an tlahniam niin an sawi. Kum 2016-17 atana state wise report pawh a chhuak leh thuai dawn a, chutah chuan zûk leh hmuam do kawnga an thawhpuite nen nasa taka ṭan an lakna avangin Mizoram dinhmunin hma a sawn an beisei thu Vanglaini an hrilh.

Health & Family Welfare ministry, World Health Organisation (WHO) leh Tata Institute of Social Science (TISS) ten vaihlo zuk leh hmuama India ram state hrang hrang dinhmun an zirchianna thar, GATS-II, 2016-17 aṭanga a lan danin, ram pumah meizial zu 3.3%-in an tlahniam a, a hmuam chi (smokeless tobacco) ti ṭhin 4.5%-in an tlahniam bawk. GATS zirchianna hi kum 15 chung lam zingah chauh a ni.

GATS-II aṭanga a lan danin, hmeichhia aiin mipain zûk leh hmuam an la ti nasa zawk. GATS -I (2009-2010)-ah India rama mipa zuk leh hmuam ti chu 47.9% a nih laiin, GATS-II (2016-2017)-ah chuan 42.4%-ah a tlahniam tawh a, a tlakhniamna hi 5.5% a ni.

Hmeichhia bikah chuan, GATS-I (2009-2010)-ah hmeichhia 20.3%-in zuk leh hmuam an tih laiin, GATS-II (2016-2017)-ah chuan 14.2%-in an ti a, a tlakhniamna chu 6.1% a ni.

GATS-I ah hian ram pum huapa zûk leh hmuam titute chu chawhrualin kum 17.9 an tlina ti ṭan an ni a, GATS-II-ah chuan kum 18.9 an tlina ti ṭan an ni thung.

Second hand smoke (meizial zûte bula awm vanga meizuk khu dawng) zatah pawh hmasawnna a awm. Puipunna hmuna second hand smoke awm zat chu GATS-I ah 29% a nih laiin, GATS-II ah chuan 23% a ni a; mahni in chhunga second hand smoke zat pawh GATS-I ah 52.3% a nih laiin, GATS-II ah chuan 38.7% a ni.

MSTCS hotute sawi danin, Mizorama district hrang hrangah September 2017 chhung khan zûk leh hmuam sim duh mi 232-in tobacco cessation clinic an pan a; sorkar kum kal lai 2017-18 ah September thla thlenga clinic pantu chu mi 1,694 an ni. September 2017 chhung khan tobacco cessation clinic pantu zinga 26.22%-in zûk leh hmuam an sim.

September thla chhung bika sim zingah Aizawl West District hnuaia State Referral Hospital chu sim tamna ber niin, clinic pantu zinga 50%-in an sim a; State Referral Hospital hi clinic thar a nih avangin sim zat hi an tam ber riha ngaih a ni. Champhai district chu pahnihna niin, 30.33%-in an sim a, pathumna Lawngtlai district-ah 30%-in an sim a ni.

Mamit district-ah tobacco cessation clinic pantu zinga 29.68%-in an sim a, Aizawl East district-ah 27.18%, Lunglei district-ah 23.39%, Kolasib district-ah 23.14%, Siaha district-ah 21.51% leh Serchhip district-ah 8.69%-in an sim bawk.

MSTCS-in an zir chian danin, Aizawl Civil Hospital-a damlo, Medical Board hmaa inlan mi 59 zingah cancer vei mi 15 (25.42%) an awm a; cancer vei zinga mi 12 chu vaihlo zûk leh hmuam ti an ni. MSTCS hotute chuan, Mizorama district hospital zawng zawng leh Mizoram State Cancer Institute, Zemabawkahte tobacco cessation clinic din a ni tawh tih sawiin, OPD hun chhungin pan theih reng an nih thu an sawi a; Chhinga Veng Presbyterian Kohhrana Social Front nen ṭangkawpin Chhinga Veng kohhran hall-ah satellite clinic an din thu an sawi bawk.

September 2017 chhunga
Tobacco clinic-a sim zat
District Sim zat
Aizawl West 50%
Champhai 30.33%
Lawngtlai 30%
Mamit 29.68%
Aizawl East 27.18%
Lunglei 23.39%
Kolasib 23.14%
Siaha 21.51%
Serchhip 8.69%