Mizoramah SHG 1,094 din a ni tawh

Deendayal Antyodaya Yojana - National Urban Livelihoods Mission (DAY-NULM) hnuai­ah Mizoramah self help group (SHG) 1,094 din a ni tawh a; SHG, pawl leh mimal ṭhahnem tak hnenah loan Rs. 9,26,71,471 pek a ni tawh.

DAY-NULM hnuaia Social Mobilisation & Institution Development (SMID) hmangin Mizoram pumah SHG 1,094 a ni tawh a, SHG 892 hnenah revolving fund pek a ni tawh. SHG hrang hrangte inzawmkhawmna Area Level Federation (ALF) 39 din a ni tawh a; SHG-te enkawla vil zui turin resource organisation pasarih rawih mek an ni.

DAY-NULM hnuaia Self-Employment Programme (SEP) kaltlangin khawpuia mi harsa zawkte hnenah bank loan hmanga eizawnna bul ṭan theih nan bank loan 7% interest subsidy pek a ni ṭhin a; loan hi mimal 433 hnenah Rs. 6,40,30,471, group enterprise 62 hnenah Rs. 2,23,95,000 leh SHG-te hnenah Rs. 62,46,000 pek a ni. Loan-ah hian a pung (interest) atan sorkarin subsidy a pe a, chuta tan chuan Rs. 24,52,791 a tumsak tawh.

Employment Through Skills Training and Placement (ESTP) kaltlangin khawpuia ṭhalaite hnenah training pek ṭhin niin, mi 11,710-te chu course hrang hrangah training pek an ni tawh a; Scheme of Shelter for Urban Homeless (SUH) kaltlangin mi harsa zawkte chenna tur in thar sak a nih bakah, chenna (shelter) 50 thawm ṭhat a ni tawh bawk.

Support to Urban Street Vendors (SUSV) hnuaiah kawtthlera thil zuarte (street vendor) enfiah niin, street vendor 1,531 hnenah ID card pek a ni tawh a; bank nena thawk dunin financial literacy camp vawi 15 buatsaih tawh a ni.

UDPA hotute chuan, Mizoram chu India ramah NULM kalpui ṭha ber state a ni mek niin an sawi a; DAY-NULM ṭan hma, SJSRY a nih ṭhin lai pawhin India rama state tê zing­ah 'Best Performance Award' an lo dawng tawh tih an tarlang bawk.

DAY-NULM hi Mizoramah chuan Urban Development & Poverty Alleviation (UDPA) department-in an kalpui a ni.