Ram tana rammúte hamṭhatna tur tihmâkmawhah kan nei dawn - R Tlanga

Nimina Mizo Hnam Runa inkhawmah MNF vice president R Tlang­hmingthanga'n thu a sawi a, hnama innghat party an ral ve ngai lo niin a sawi a; an sorkar leh chuan ram tana nun thàpa ram múte hamṭhatna tur tihmâkmawha an neih dawn thu a sawi bawk.

R Tlanghmingthanga chuan, "Mimala innghat party chu a innghahna mihring a ral rualin party a zuih ral nghal ṭhin. MNF party erawh chu Mizo hnama innghat, a siamtu Pathian leh a siam Mizote ta a nih avangin Mizo hnam a ral hma chuan a ral ve lo ang,” a ti.

Mizo hnam sipai, kum 20 chuang ram tana nun thàpa martar-te leh dama hawte'n tun thlenga ngaihsak an hlawh tâwk lo chu pawi an tih thu sawiin Tlanghmingthanga chuan, "MNF-in kum 10 sor­karna kan chan lai ngei pawh khan an beisei kan thlen zo lo kha pawi kan ti. Kum 2018-ah sor­karna kan chang leh a nih chuan, anni hi kan ngai pawimawh tawh dawn," a ti a; Congress party-in Mizoram sorkar sum hmanga an mite zak miah loa an duhsak ngam chuan, anni pawhin ram tana nun thàptute din chhuahna tur chu tihmâkmawhah an nei dawn niin a sawi.

R Tlanghmingthanga chuan, MNF-in kum 10 sorkarna a chan chhungin MNF leh India inremna thuthlung an duh anga an bawhzui chak tawk lo chu pawi an tih thu a sawi a, "Kan sorkar leh a nih chuan, inremna thuthlung kha ngai pawimawhin, remna thuthlungin min pek keimahni nihna leh neitu nihna leh kan kal­phung chhawm nunna leh kan sakhua nen lam tihbuai theih loha inremna thuthlungin min humhalhna hi a takin kan kalpui dawn a ni,” a ti.