Zoram thar din kan tum - ZNP Vice President

ZNP vice president Dr Kenneth Chawngliana chuan, ram rorelna kalphung thlak turin mihring thlak ringawtin Mizoran natna a tidam zo tawh lo nia sawiin, anni chuan kalphung tharin Zoram thar din an tum thu a sawi.

Dr Kenneth Chawng­liana hian nimin khan ZNP pisa inkhawmah thu a sawi a, “Kum 30 chuang roreltu pahnih kutah kan ram a awm tawh a, keini chuan tuna kan kal dan pangngai ni lo, kalphungtharin Zoram thar din kan tum. Nihna leh mihring inthlak leh ringawt ṭhin hian kan ram natna a tidam zo tawh lo. Congress hian pawisa hmanga sorkar an tum a, MNF pawhin an duh vang reng ni loin pawisa hmanga tlin tumin BJP an zawm a ngai. Keini chuan pawisa hmanga tlin kan khel ve lo a, sorkar kal­phung thar kan zuar zawk a ni,” a ti.

Hydro electric power project (HEP) chung­changah Kenneth Chawng­liana chuan MNF leh Congress sorkar chu an kut a hmui lo nia sawiin, “Bairabi HEP an hluihlâwn a, Kau-Tlabung lah hotupa ber thubuai vangin hun rei tak chhung tihkhaihlak a ni. Tuirial HEP lah khatih laia CM-in a tlakpui ṭhak a, Congress sorkarin an tharthawh a, project siam man lo sang zelah unit khat Rs. 8 chuanga lei a lo ngai dawn ta," a ti a; project lian zawng zawng eirukna leh a hun taka zawh a nih ṭhin loh avangin mipuiin an tuar zel tih a sawi.

ZNP inkhawmah hian ZPM Steering Committee chairman Lalliansawta pawhin thu a sawi a ni.