Lirthei intlân chhâwk zel dawn

Traffic SP C Lalthanmawia chuan thupek chhuahin, lirthei intlân chhâwk / indin chhâwk enchhinna kalpui chu chhunzawm zel tur a nih thu a tarlang a; mipui hriat tur pawimawhte a puangzar nghal.

Traffic SP tarlan danin, Coordination Committee on Traffic Management meeting, October 27, 2017-a ennawn a nih hnuah lirthei intlan chhawk chu kalpui chhunzawm zel ni se, tia rel a nih ang leh, Mizoram sorkar notification No.B. 12021/10/04-TRP Dt.22.8.2008 leh MV Act, 1988 Section 115-in thuneihna a pek angin, Aizawl khawpuia mipui vantlang him tlan zawk nan leh lirthei tawt lutuk tihziaawm nan Aizawl khawpui (AMC area) chhungah November 1, 2017 aṭanga thu leh awm hma chu intlân chhawk hi kalpui tur a ni.

Thupek zâwm lo mante chu MV Act Section 179 hmanga hrem an ni ang.

Intlân chhâwk dan leh a huam chin
. Intlân chhawk hian mimal motor leh sorkar motor, two-wheeler tiamin (exempted bik tiam loin) a huam ang.
. Lirthei registration number-a digit tawp ber ang zel ní ah lirthei tlan chhuah khap a ni. Entirna'n, 4-a tawp chu ni 4, 14, 24-ah a tlan chhuak thei lo a, 2-a tawp chu ni 2, 12, 22-ah a tlan chhuah theih lo. 1-a tawpte chu ni 31 awmna thlaahte chuan ni 31-ah an tlan chhuak thei ang.
. Tlan chhuah phal loh hun hi zing dar 8:30 aṭanga tlai dar 5:30 inkar a ni.
. Mizoram district dang leh state páwna register, private motor Aizawl khawpuia awm leh tlan lut tur reng rengte pawh intlan chhawk hian a huam.
. Tlan chhuah phal loh ni-ah hian Pathianni a tel lo.

Intlan chhawkin a huam lohte
. Governor, Chief Minister leh Speaker-te (an carcade tiamin)
. Public service vehicle - city bus/bus, maxicab/sumo (state dang registered huamin), auto-rickshaw, institution bus, department bus, two wheeler taxi.
. Taxi-te chu tuna an intlan chhawk dan pangngai angin an tlan chhunzawm ang.
. Police department motor duty, traffic police duty-te, Fire (FES) motor, Excise & Narcotics motor duty, Medical & Hospital emergency duty, ambulance/morgue van, executive magistrate law & order duty leh emergency duty, media mi (MJA sticker tarte chauh), PHE emergency duty leh PHE tuisem, P&E emergency duty, bawnghnute sem, chanchinbu sem, AMC hnuaia bawlhhlawh paih motor duty, army leh para-military force, government gepartment/office despatch rider.
. Rualbanlote tana special vehicle.
. District dang aṭanga sorkar thil pawimawha duty te, Law & Order leh Essential Commodities duty-te chu Aizawl City Traffic Police-te an hrilh hmasak hnuah ngaihhnathiam an ni ang.
. Lirthei 407 (truck) leh a chung lamte NH-54 Bawngkawn leh Zemabawk inkara tlan dan tur Traffic Police-te'n an ruahman tawhsa anga tlan tlang turte.