KHAWTHLIR
SIRD-ah training
State Institute of Rural Development & Panchayati Raj (SIRDPR) leh National Institute of Rural Development & Panchayati Raj (NIRDPR)-te chuan nimin khan SIRDPR auditorium-ah ‘Certification of state level master resource persons training’ an buatsaih ṭan a, SIRDPR deputy director Khawlsiamthanga Khawlhring-in a hawng. Training-ah hian mi 47 an tel a, NIRDPR course director Neelam Kumari pawhin a hmanpui a ni.
Minister-in kâwm
Power & Electricity minister R Lalzirliana chuan nimin khan a pisaah P&E Engineering Officers Association office bearer-te a kâwm a; P&E department hmasawnna turte a sawipui. PEOA hruaitute hi an president Vanlal-tlana hoin an kal a; ram hmasawnna atana an ngaih pawimawh hrang hrangte sawiin, minister chu theihtawp chhuaha ṭawiawm an tum thu an hrilh a ni.
Awmpuii lawmpui
Panchayat Mahila Shakti Abhiyan (PMSA) hruaitute chuan nimin khan minister Lalawmpuii Chawngthu chu a pisaah kal chilhin, lawmpuina leh duhsakna an hlan. Vanlalawmpuii Chawngthu chuan, minister nihna chelh tura a kawng zawhah hatsatna tam tak paltlang ngai tih sawiin, "Vawi leh khata ban phak theih mai a ni lo," a ti a; hmeichhiate roreltu ṭha an nih theih nan inchher hriam a pawimawh thu a sawi.
Aiawh tum man
Police department-in tunlaia police constable lakna an kalpui mekah nimin khan metre 100 tlannaah mi ai tlân tum mipa pakhat an man a, a lakah thubuai ziah luh a ni.
ZPM V/C ding
Champhai Zion Venga MNF V/C member pakhat chuan ZNP a thláwp a, hei vang hian Zoram Peoples Movement (ZPM) V/C din a ni. Champhai Zion Vengah hian V/C member panga an awm a, Congress party leh ZNP ten member pahnih ve ve leh MNF party-in member pakhat an nei ṭhin a; MNF member hian Congress member-te a thlàwpna hnûkdâwkin ZNP a thláwp a, hei vang hian ZPM V/C din a ni tiin thudawnna chuan a sawi.