Sample endik aṭanga hripui Vei hmuh tawh zat 1.80%

Covid-19 vei leh vei loh hriat nan Mizoram aṭangin swab sample 20,053 endik a ni tawh a, chu'ng aṭang chuan hripui vei mi 361 hmuh chhuah niin, za zelah 1.80% a ni.

Integrated Diseases Sur­veillance Programme (IDSP) chhinchhiah danin, Mizoram aṭanga swab sample endik tawh zawng zawng 20,053 zinga a tam ber, 18,779 chu Zoram Medi­cal College (ZMC)-a endik a ni a; chu chu 93.65% a tling. Sample endikna hmasa ber National Institute of Cholera and Enteric Disea­ses (NICED), Kolkata-ah February thla tìr lamah panga thawn a ni a, Guwahati Medi­cal College-ah 12, Silchar Medical College-ah 41, Lung­lei Civil Hospital-ah 920 endik tawh a nih bakah, Champhai leh Kolasib-ah Rapid Antigen Test hmangin sample 296 endik a ni tawh bawk.

NICED, Kolkata leh Silchar Medical College-ah Covid-19 vei hmuh chhuah a ni lo a, Guwahati Medical College-ah March 24, 2020 khan Mizorama hripui vei hmasa ber hmuh chhuah a ni. Covid-19 vei hi ZMC-ah mi 334, Lunglei Civil Hospital laboratory-ah Truenat-PCR hmangin mi 24 leh Rapid Anti­gen Test hmangin Champhai leh Kolasib-ah pakhat ve ve hmuh chhuah a ni tawh.