Mi 349-te dinhmun enfiah

Nimin khan Zoram Medical College (ZMC) laboratory-ah State Referral Hospital bakah, Aizawl, Lawngtlai leh Hnahthial aṭanga dawn mi 349-te swab sample endik a ni a, he thu ziah lai hian result a la chhuak lo. Mizoramah Covid-19 hripui vei hmuh tawh mi 361 zinga 160-in an la vei mek a, vei mek zinga a tam zawk - mi 123 chu sipai mi leh sa an ni.

Sorkar thuchhuak tawhte aṭanga a lan danin, Mizorama Covid-19 vei tawh zawng zawng zinga mi 201 chuan an vei tawh lo (negative tawh) a, chu chu 55.68% a tling. Mi 160-in vei mekin, chu chu 44.32% a ni a; vei tawh lo mi 201 zinga mi 193 chhuak tawhin, mi pariat (Lungleia BSF sipai vek) chhuahtir an la ni lo. 

Mizorama Covid-19 vei hmuh chhuah tawh 361-te chu mipa 264 leh hmeichhia 97 an ni a; an zinga mi 205 (56.79%) chu civil mi niin, mi 156 (43.21%) chu sipai an ni. Hripui vei mek mi 160 zingah civil mi 37 (23.13%) an awm a, mi 123 chu sipai an ni thung. Nimin khan Covid-19 vei rinhlelh thilah State Referral Hospital-ah mi pahnih dah luh thar an ni a, Pathiannia dah luhte nen nimin khan an swab sample laka endik a ni.