Mizo sipai rawn haw pakhatin khung hran hmain an in a pan

Mamit district mi leh sa sipai pakhat, Jammu & Kashmir aṭanga rawn haw chuan quarantine centre pan loin, an in a pan hmasa tih hriat chhuah a ni a, sorkar thuneitute leh task force hmalaknain quarantine centre-ah dah luh a ni.

Mamit aṭanga Vanglaini thu dawn danin, J&K aṭanga rawn haw sipai hi DC Rest House-a khung hran tura tih a ni a, a rawn haw lai pawhin sorkar official-te pawhin an lo nghak a ni. Mamit a panna kawngah sorkar official duty-te'n an be pawp reng a, Mamit thlen dawn hnaiah a be pawp thei lo. July 26, Pathianni zing dar 1 vel khan Mamit a thleng nia hriat a ni.

Mamit a thlen hnuah quarantine centre pan loin, quarantine centre bula an inah haw a tum a, an kawngkhar a kik chu ṭhenawm khawvengte'n hriain, sorkar thuneitute hnenah an thlen ta a ni. Sipai hi a chhungte pawhin kawngká an hawnsak duh lo a, quarantine centre-a kal turin an ti niin an sawi. Thuneitute leh task force-te chuan DC Rest House-ah dah loin, Tourist Lodge-ah an khung hrang a ni. Sipai hi a chhungte nen intlawhpawh hman lo mah se, fimkhur thilah a chhungte chu an swab sample test result a chhuah hma chuan páwna chhuak tawh lo tura hriattir an ni.