Mipui châwm zo hman ṭangkai theih ram zau tak kan nei - Chief Minister

Mizoram Civil Service Association (MCSA) chuan nimin khan Aijal Club-ah General Conference vawi 46-na an hmang a; khuallian chief minister Zoramthanga chuan, Mizoramin mipui châwm zo hman ṭangkai theih ram zau tak a neih thu a sawi.

CM Zoramthanga chuan, Mizoram chhungah mipui châwm zo tur, hman ṭangkai theih ram zau tak, sik leh sa, ruahtui duhthusamte chu enliam mai loh tur a nih thu a sawi a, "Economy hmasawnna atana hman ṭangkai theih vek a ni tih rilru pú a, a nacháng hre tura ngaihtuahna thlâk a ṭul," a ti.

Hripui léng leh thil dangte avanga Mizoram sorkarin sum harsatna a tawh dan sawiin Zoramthanga chuan, "Sorkar laipui aṭanga sum kan hmuh ṭhin, budget-ah pawh telh vek tawh hripui vangin cheng vbc. 3,000 chuang kan hmu lo," a ti a, chutiang a nih laia tun dinhmun an thleng chu vanneihthlak a tih thu a sawi.

Chief Minister chuan, resource mobili­sation mamawhna sawiin, "Chu'ng atan chuan MCS officer-te hi thuràwn petu pawi­­mawh in ni. In hnaah rinawm leh ṭha­hnem­ngai takin thawkzui zel ang che u," a ti.

MCSA president H Lianzela chuan, an pawl hmalaknate leh sorkar aṭanga an beiseite a tarlang a; MCSA member-te'n sorkar hmalakna tihhlawhtlinna tura theihtawp an chhuah ṭhin avangin a lawm thu a sawi a ni.

MCSA ROREL ṬHENKHAT
1) District thar pathum - Saitual, Khawzawl leh Hnahthialahte district administration tihchangtlun ni se.
2) Arunachal-Goa-Mizoram-Union Territories (AGMUT) cadre aṭang hian Mizoram tan all India service cadre hran neih ni se.
3) Chak zawka Mizoram economy a ṭhan zelna tura state sorkar hmalaknate MCSA-in thlâwp tlat ni se.
4) Nasa zawka e-Governance kalpui tura state sorkar hmalaknate MCSA-in thlàwp tlat ni se.