Police Commemoration Day hman a ni

Nimin, October 21 khan India ram pumah Police Commemoration Day hman a ni a, Mizoram­ah pawh district head­quarters leh battalion head­quarters-ahte hman a ni.

Mizorama hmanna pui ber, Aizawlah chuan Mizoram police, duty laia hmelma kut tuara thi tawhte hriatrengna lungphun, 1st MAP head­quarters, Armed Venga Martar Thlânah director general of police Devesh Chandra Srivastava hoin police officer-te'n pangpar an dah.

Kumina Police Commemoration Day-ah hian India ram hmun hrang hranga September 1, 2021 leh August 31, 2022 inkara duty laia police thi mi 261-te hming chhiar chhuah a ni a; urhsûn takin sûnna hun hman a ni.

October 21, 1959 khan ralthuam nena India rama rawn lut ru China sipaite chuan mahni ram veng him tura hna thawk (duty) mek India police-te chu Hot Springs (Ladakh)-ah an lambun a, police 10 an thi. He ní hi police, ram tana nun pete hriatrengna Commemoration Day atan sorkar laipui chuan a puang a ni.