MNF jubilee-a tel turin mipui an sáwm Kan President-in dâwtin mi a bei ngai lo - MNF

MNF hruaitute chuan vawiin hian an kum 60-na, diamond jubilee lawmna khârna inkhawm Vanapa Hall-ah an buatsaih dawn a, tel turin mipui an sáwm. MNF hruaitute chuan, an president Zoramthanga'n dâwt hmangin mi a bei ngai lo niin an sawi.

MNF vice president Vanlal­zawma chuan, MNF dintu Laldenga thih hnuah hruaitu ropui Zoramthanga an neih thu sawiin, "July 1990 aṭang khan kum 32 zet, vawiin thlengin min hruai. A chángin opposition-ah kan awm leh hnuin, vawiinah Zoram kaihruai turin Pathianin MNF a ruat. Party dang ang lo takin, president leh party hming kan thlak ngai lo," a ti.

Vanlalzawma chuan, MNF President-in a awmna a sawn ve ngai lo tih sawiin, "Chhel tak leh huaisen takin a kaihhruai MNF tan a ding reng. Pathian ráwn chungin ke a pên ṭhin a, dâwt leh thu dik hlel hmangin mi dang a bei ve ngai lo," a ti a; an President chu an chhuan thu a sawi.

October 22, 2021 khan MNF-in kum 60 a tling a, kumin kumtluanin diamond jubilee pualin hma an lak thu sawiin Vanlalzawma chuan, "MNF-in kum 60 a tlinna pual hian kan founder president, Mizo hnam pa Pu Laldenga leh mi dang te, hnam pasalṭha martarte kan hre reng a, zahna chibai kan bûk a ni," a ti.

MNF Vice President chuan, Mizoramah tualṭo party ding tawh 25 zinga 22 chu an ral leh mai nia sawiin, "National party pawh eng emaw zat a rawn ding a, tam tak an ral leh mai ṭhin. MNF-in kum 60-na a lawm thei a, Pathianin tun thlenga min hruaina hi a lawmawm tak zet," a ti a; MNF chu 'Pathian leh kan ram tan' tia innghat tlat a nih thu a sawi.

MNF hruaitute chuan, MNF diamond jubilee lawm khàrna hun vawiin hian Vanapa Hall-a an hman turah MNF tana thâ leh zung, ngaihtuahna séng tawh zawng zawng leh, Mizo mipui, hnam rilru pú apiang chu tel vek turin an sáwm a ni.